वीरगंजमा शुक्रबार गहवामाई रथयात्रा

lokkalyankari

वीरगन्जको प्रमुख शक्तिपीठ गहवामाई मन्दिर पुर्ननिर्माण भएको १३ औं वर्ष पूरा भएको उपलक्ष्यमा शुक्रबार ‘गहवामाई रथयात्रा’ निकालिदैंछ । बिहिबार मन्दिर प्रागंनमा पत्रकार सम्मेलनको आयोजना गरि गहवामाई मन्दिर तीर्थ क्षेत्र विकास समितिले रथयात्रामा एक लाख भन्दा बढी भक्तजनहरु सहभागी हुने  अनुमान गरेको छ । 
 पत्रकार सम्मेलनमा समितीका अध्यक्ष श्याम पोखरेलले सुरक्षाकै विषयलाई लिएर सुरक्षा निकायका प्रमुखहरुसंग पटक पटक छलफल गरिएको जानकारी दिए । छलफलमा सुरक्षा निकायका प्रमुखहरुले प्रयाप्त संख्यामा सुरक्षाकर्मी परिचालन गरिने प्रतिबद्धता जनाएको उनले बताए । यसका अतिरिक्त समितिका तर्फबाटपनि दुईसय बढी स्वंयसेवकहरु खटिने जानकारी उनले दिए ।

पत्रकार सम्मेलनमा अध्यक्ष पोखरेलले रथयात्राको सम्पूर्ण तयारी पुरा भइसकेको जानकारीपनि गराए । रथयात्रा आयोजनमा करिब २० देखि २५ लाख रुपैयाँ खर्च हुने अनुमान रहेको उनले बताए । उनका अनुसार, शुक्रबार बिहान गहवामाई मन्दिरमा विशेष पूजापछि बिहान ७।३० बजेदेखि रथयात्रा सुरु हुनेछ । रथयात्राले नगरका विभिन्न स्थानको परिक्रममा गर्ने र पुन मन्दिर प्रांगणमा फर्किएर समापन हुने तथा शुक्रबार नै साँझ मन्दिर प्रांगणमा धार्मिक भजनकिर्तन आयोजना गरिने उनले बताए । यस्तै शनिबार साँझ मन्दिर प्रांगणमै रथयात्राको प्रसाद वितरणका लागि ‘महाभण्डारा’पनि आयोजना गरिने जानकारी पोखरेलले दिए ।

‘गहवामाई रथयात्रा’ यात्राका लागि वीरगन्ज महानगरपालिकाले महानगरमा रहेका सबै सामुदायिक तथा संस्थागत विद्यालयहरुमा शुक्रबार विदापनि दिएको छ ।यता  ‘गहवामाई रथयात्रा’ का क्रममा हुनसक्ने सम्भावित जोखिमलाई मध्यनजर गरेर वीरगन्जमा सुरक्षाकर्मीलाई हाइ अलर्टमा राखिएको पर्साका प्रमुख जिल्ला अधिकारी गणेश अर्यालले बताए । अर्यालले भने,‘ रथयात्राको सुरक्षाका सन्दर्भमा स्थानीय प्रशासन र प्रहरी हाइ अलर्टमा छ । रथयात्राका क्रममा प्रयाप्त सुरक्षाकर्मी परिचालन गरिएको जानकारी दिनुभयो ।